Kawani nga mikiha kang Rama pasweldohan

CEBU, Philippines — Usa ka magbabalaod sa Dakbayan sa Sugbo nisaad nga mo-sponsor og resolusyon aron mabayran ang pito ka buwang nahabiling suweldo unta sa upat ka mga kawani sa city hall kansang mga reklamo maoy hinungdan sa unom ka buwan nga preventive suspension ni Cebu City Mayor Michael Rama ug laing pito ka mga opisyal sa siyudad.

Kaniadtong Huwebes sa gabii, nagpundok ang mga supporters sa Plaza Sugbo Grounds alang sa prayer rally alang ni Rama nunot sa balita sa desisyon sa Office of the Ombudsman nga pagsuspenso kaniya og unom ka buwan.

Ang upat ka mga kawani nga pulos regular sa city hall nisang-at og reklamo batok kang Rama ug laing pito ka opisyal tungod sa kapakyas sa pag release sa ilang napulo ka buwan nga suweldo niadtong Pebrero 23, 2024.

Lakip sa nitambong sa prayer rally aron ipadayag ang ilang suporta para kang Rama mao si Cebu City Councilor Noel Wenceslao, Chairman sa Committee on Budget and Finance sa Cebu City Council.

Gawas sa pagpakita sa iyang suporta kang Rama nga iya usab nga political partymate, si Wenceslao nipahibawo nga siya ang mo-sponsor sa maong resolusyon.

Matud pa ni Wenceslao nga tungod kay ang sweldo sa upat ka mga reklamante nalakip sa annual budget sa miaging tuig, kinahanglan nga mopasar og resolusyon aron sila makapagawas sa ilang sweldo.

Dugang pa, si Wenceslao niingon nga nitambong siya sa prayer rally aron ipakita ang iyang suporta kang Rama ug midugang nga wala sila magdahom nga ingon niini kadako ang desisyon nga ipagawas sa Office of the Ombudsman.

“Nga hopefully ang ako lang, kini masulbad sa malinawon nga paagi… mahatag ang hustisya,” matod niya. — /IBM (BANAT NEWS)