Mandaue Presidencia gipasigarbo atol sa Gabii sa Kabilin

CEBU, Philippines — Ang Mandaue Presidensia maoy nag-una sa gipasigarbo sa mga Mandauehanon sa gipahigayon nga Gabii sa Kabilin karong tuiga 2024.

Kini ang nalakip sa dakbayan sa Mandaue sa mga gipasundayag nga adunay historical site.

Gipasigarbo sa mga Mandauehanon ang Mandaue Presidensia tungod kay kabahin na man kini sa makasaysayanong butang sa maong dakbayan.

Suma pa ni City Councilor Maline Cortes-Zafra nga sa kasaysayan sa Mandaue Presidencia kini giisip nga lugar nga dangpanan kaniadto sa karaang panahon ug dinhi nakasentro ang pagserbisyo sa matag Mandauehanon.

Gipakadak-an ni City Councilor Cynthia Cinco Remedio ang kamahinungdanon sa Mandaue Presidencia nga nagpadayag sa kulturang Mandauehanon ug nagsimbolo sa pagka-progresibo sa dakbayan.

Sa Gabii sa Kabilin gilakbitan usab og saysay ang kabahin sa mga monumento nga anaa sa Mandaue Heritage Plaza sama sa natampo nga kaayohan ni Sotero Cabahug.

Adunay demonstration nga gihimo kabahin sa paghimo og mga delicacies nga tatak Mandaue sama sa Bibingka ug Tagaktak nga nahimo gihapong panginabuhian karong panahona sa siyudad sa Mandaue.

Samtang nanghinaut si Cebu City councilor Donaldo Hontiveros nga makahatag og inspirasyon sa mga misalmot sa Gabii sa Kabilin ang mga memorabilia, relics ug heritage sites nga ilang gibisita.

“As we immense ourselves in the symphony of the past let us be inspired to create a future worthy of remembrance,” suma ni Hontiveros kinsa maoy vice chairman sa Cultural and Historical Affairs Commission.

Suma pa usab ni City Tourism Commission chair konsehal Jocelyn Pesquera nga ang maong event usa ka maayong pamaagi alang sa kabataan nga makahimo sila sa pagdayeg sa kulturang Sugbuanon o sa Visayas culture sa kinatibuk-an. (CEBU NEWS)