CEBU, Philippines — Mokabat kapin P10 milyones nga gituohang shabu ang nasakmit gikan sa 25 ka mga tigpayuhot niini nga nadakpan sa usa ka semanang Simultaneous Anti Criminality Law Enforcement Operation (SACLEO) sa kapolisan sa Lapu-Lapu City Police Office (LCPO).
Matud pa moabot 1,477.55 gramo nga gituohang shabu ang ilang nasakmit. Ang mga nadakpan, tulo niini mga High Value Individual (HVI) ug 22 ka mga Street Level Individual (SLI), silang tanan nadakpan pinaagi sa buy bust operations.
Si Police Lieutenant Colonel Christian Torres, pangulo sa City Investigation Detection and Management Unit (CIDMU) ug tigpamaba sa LCPO miingon nga ang ilang usa ka semana nga SACLEO ilang gipahigayon sugod sa Abril 20 hangtod sa Mayo 3, 2024
Matud pa ni Torres nga ang maong gidaghanon sa mga pusher ilang nadakpan sulod sa 22 ka buybust operations.
Si Police Captain Abraham Igot, pangulo sa City Drug Enforcement Unit (CDEU) sa LCPO mingon nga ang duha sa mga HVI nga pusher nga ilang nadakpan pulos molupyo sa Siyudad sa Sugbo.
Matud pa ni Igot nga nagpadayon karon ang ilang gihimo nga mga pakisusi alang sa pag-ila sa gikuhaan og shabu sa mga dinakpan.
Matud pa ni Igot kun basihan ang gidaghanon sa nasakmit nilang shabu , timailhan kini nga nagkadaghan na usab ang namalik sa paggamit niini sa siyudad sa Lapu-Lapu. IBM BANAT NEWS