CEBU, Philippines — Usa ka matang sa text scam ang nadawat nga reklamo sa City of Talisay-Traffic Operation Development and Authority (CT-TODA).
Ang nahisgutang text scam mao usab ang reklamo nga nadawat gikan sa Land Transportation Office (LTO).
Giingong adunay madawat nga text ang usa ka indibidwal nga pahinumdum gikan kunohay sa buhatan sa LTO nga giingong nipatuman og “no contact policy” ug maningil kini og bayad sa traffic violation.
Adunay link nga ipa-click ang nag-text niini aron adto mobayad sa traffic violation.
Apan gihimakak kini sa otoridad nga sila ang nagpatuman niini.
Si Jonathan Tumulak, pangulo sa CT-TODA nipahibawo nga adunay duha ka motorista nga ilang nadakpan ug naisyuhan og citation ticket nga nakadawat sa text scam.
Matud ni Tumulak nga kadtong motorista nga nakalapas sa lagda sa trapiko nga nakadawat og citation ticket mahimo nga mobisita sa ilang buhatan aron maklaro kini ug dili magpadala sa mga scam pinaagi sa text.
Nasayran nga dili lang ang mga motorista nga naisyuhan og citation ticket sa CT-TODA ang nakadawat og text scam lakip na ang pipila ka buhatan sa traffic team.
Si Tumulak nanawagan sa mga nakalapas sa lagda sa trapiko nga nakadawat og text scam nga wala sila’y gipatuman nga online transaction alang sa pagbayad sa ilang penalty lakip usab ang LTO.
Ug kong naisyuhan og citation ticket adto mobayad sa ilang buhatan dili sa online ug dili mo pindot sa link nga gihatag sa text scam. BDB BANAT NEWS