CEBU, Philippines — Gipangandaman karon sa kapolisan sa Lapu-Lapu City Police Office (LCPO) ang ilang pagsuporta sa lokal nga kagamhanan sa ipatuman nga road clearing operation.
Kini subay sa giluwatan nga Memorandum Circular Number 2024-053 sa Department of the Interior and Local Government (DILG) nga nagmando alang sa nationwide nga implementasyon sa barangay road clearing operations, assessment, validation ug recognition ubos sa Bagong Pilipinas Program.
Si Police Lieutenant Colonel Christian Torres, tigpamaba sa LCPO nagkanayon nga sila sa PNP ang nalakip usab sa maong kamandoan sa DILG sa pagsuporta sa lokal nga kagamhanan sa ipahigayon nga clearing operation.
Gibutyag ni Torres nga naglakip sa himuon sa maong clearing operation ang pagtangtang o paghawan sa mga nakaali sa kadalanan ug ingon man ang pagkuha sa
ilegal nga mga istraktura nga makatabang sa paghapsay sa dagan sa mga sakyanan ug ingon man pag-agi sa mga tawo nga maglakaw.
Dugang ni Torres nga gilambigit sa maong kamandoan sa pagsuporta sa pagahimuon nga road clearing operation ang buhatan sa kabomberohan, mga barangay tanod ug uban pa nga buhatan sa kagamhanan. BDB BANAT NEWS