CEBU, Philippines — Gituki sa regular session sa konseho sa siyudad sa Mandaue ang nasinate nga kadaut sa mga bakhaw sa gipatuman sa Department of Public Works and Highways (DWPH) nga flood control project sa Barangay Paknaan ug Barangay Labogon.
Si Architect Aracele Barlam nga maoy pangulo sa Mandaue City Environment and Natural Resources Office (CENRO) mibasol ngadto sa buhatan sa DPWH 7 tungod sa kakuwang sa Environmental Compliance Certificate sa gipatuman nga proyekto.
Pinaaagi unta sa pagkuha og ECC mahimoan og lakang aron dili makahatag og kadaut ang nahisgutang proyekto sa mga bakhaw sa maong dapit.
Samtang ang mga engineer sa DWPH 7mipasabot nga ang nasinate nga mga kausaban sa maong proyekto maoy hinungdan nga nalangan ang pagproseso sa gipangayo nilang dokumento.
Dugang nilang pagpasabot nga kinahanglan gayod nga ilang ipatuman ang maong proyekto tungod kay kini ang tubag sa suliran sa kanunay nga pagbaha sa panahon nga kusog ang ulan.
Gawas niini gihimo nila nga rason sa pagpadayon sa proyekto mao nga kun dili magamit ang gahin nga salapi alang karong tuiga mahibalik kini ngadto sa nasudnong panudlanan.
Samtang gipaniguro sa kadagkuan nga ilang hulipan ang nadaut nga mga bakhaw pinaagi sa paghulip og gatusan ka mga seedling sa bakhaw. (BANAT NEWS)