CEBU, Philippines — Patay ang usa ka 22- anyos nga babaye human kini gipusil patay sa iyang kanhi kaipon sa panimalay sa biktima diha sa Purok 1, Barangay Looc, Lungsod sa Panglao, Probinsiya sa Bohol niadtong Sabado sa buntag.
Ang biktima nga residente sa naasoy nga lugar gipusil-patay sa iyahang kanhi kaipon nga 30-anyos nga lalake, nagpuyo sa Barangay Duljo sa mao gihapong lungsod.
Matud ni Police Major John Khalev Sanchez, hepe sa Panglao Police Station nga base sa ilang inisyal nga imbestigasyon selos maoy rason nga gipatay sa suspek ang iyahang kanhi kaipon.
Giingong dunay mga bata ug hamtong nga nakakita sa paghimo sa krimen. Gikataho sab nga gilabay sa kalapukan sa suspek ang revolver nga armas nga gigamit sa krimen.
Nasayran nga taud-taod na nga nagbuwag ang suspek ug biktima nga dunay upat ka mga menor de edad pa nga mga anak.
ILEGAL NGA DRUGAS
Samtang sa pikas bahin, posibleng may kalambigitan sa illegal nga drugas ang gitan-aw nga anggulo sa kapulisan sa Mambaling Police Station labot sa pagpusil patay sa usa ka usa ka ex-convict samtang kini natulog sa gimaneho nga e-bike kagahapon sa buntag sa Sitio San Juan, Puntod 1, Barangay Mambaling, siyudad sa Sugbo.
Ang biktima nga si Dave Sardido, residente sa naasoy nga lugar kay giingong bag-o lang nakagawas sa prisuhan human kini napriso gumikan sa kalambigitan sa illegal nga drugas.
Matud pa kalit lang dunay duha ka mga lalake nga mihunong ug mipusil sa biktima samtang natulog sa e-bike ug misibat dayon ang mga mamumuno.
Nasayran nga gipusil sa ulo ang biktima ug gideklarar kini nga dead-on-arrival dihang gidala sa tambalanan. (BANAT NEWS)