Mga residente nireklamo bahin sa parking fee

CEBU, Philippines — Pipila ka mga residente sa San Pio Village sa Barangay Dumlog, Dakbayan sa Talisay ang nangreklamo labot sa gipatuman nga parking fee sa ilang lugar.

Si Adonis Espina nihulagway nga sugod sa ilang pagpuyo sa lugar wala gyud gipatuman ang parking fee.

Ang management nga nagdumala sa subdivision niusab niini sa palisiya. Hangtud nga sila gipangayoan og tag P500 nga parking fee matag buwan butang nga bug-at ra para kanila ug gihulagway nga di angay sa kantidad tungod kay low cost housing lang ang ilang gipuy-an.

Nag-urong ang mga sakyanan sa gawas sa subdivision tungod kay wala man silay sticker niini nga nagpamatuod nga nibayad sila sa parking fee. Si Carrie Alviola sa management nga bahin nipasabot nga nagpatawag sila og tigom labot niini pero ang pipila ka molupyo ang wala motuman.

Gani naghatag pa sila og notisya hangtud na nga aduna silay gipaskin diha sa gate. Nahibaw-an sab nga dili lang ang parking fee maoy gilalisan sa matag habig kundi naa na silay kaso nga nag ung-ong gumikan sa pagsira sa cooperative office ug uban pa.

Naglaraw ang mga reklamante nga magpatabang sa mayor sa siyudad labot niining ilang suliran. (BANAT NEWS)