CEBU, Philippines — Usa ka departamento ang gilaraw nga himoon sa Probinsya sa Sugbo alang sa insurance program niini nga Sugbo Segurado.
Kini tungod sa gipaabot nga grabeng trabaho nga mahimo nga kinahanglan og igong mga tawo ang molihok tungod sa maong programa.
It should be a department, we need people to run this, matud ni Gobernador Gwendolyn Garcia. Ubos sa Sugbo Segurado nga programa, ang mga empleyado sa Kapitolyo apil na mga opisyal niini lakip ang mga mayor, bise mayor konsehal, ug mga opisyal ug trabahante sa barangay ang mahatagan og accident ug life insurance.
Bisan ang mga teaching ug non-teaching personnel, mga president sa Parent-Teacher Associations sa Department of Education (DepEd) sa Probinsya sa Sugbo ug ang mga canyoneering tour guides sa Alegria ug Badian ang maapil usab sa maong insurance program.
Unang nihimo og lakang ang gobernador paghimo og kaugalingong insurance program sa Kapitolyo tungod sa dili balanse tali sa insurance claim nga makuha sa mga empleyado ug sa gibayran nga premium sa Probinsya. (BANAT NEWS)