CEBU, Philippines — Duha lang ka dagkong kalihokan ang gikompirma nga tambongan ni Presidente Ferdinand "Bongbong" Marcos, Jr. sa iyang pagbisita sa Sugbo sa Abril 27, 2024.
Base sa taho sa Public Information Office (PIO) sa Dakbayan sa Lapu-Lapu nga ang duha ka laing kalihokan ang wala na malakip sa tambongan sa president.
Naglakip sa mga kalihokan nga tambongan ni Marcos mao ang reenactment sa ika-503rd nga Kadaugan sa Mactan sa Abril 27, 2024.
Ang ikaduha mao ang capsule laying ceremony sa gitukod nga convention center sa Mactan Newtown Expo isip kabahin sa pagpangandam sa ASEAN Summit 2025 diin ang Siyudad sa Lapu-Lapu maoy napili nga host niini.
Ang laing duha ka kalihokan nga himuon sa maong adlaw naglakip sa ground breaking ceremony sa Skyway ug cutting of ribbon sa model unit sa socialized housing ang posible nga dili na mahinayon. (BANAT NEWS)