CEBU, Philippines — Ang Department of Social Welfare and Services sa Cebu City Government niapod-apod og relief boxes ngadto sa 100 ka pamilya sa Barangay Smabag II nga apektado sa dakong sunog niadtong Abril 8, 2024.
Ang maong mga pamilya gikan sa Sitio Riverside, Kalubihan ug Grupa.
Matud ni Portia Basmayor, pangulo sa DSWS nga gawas sa 100 ka pamilya aduna pa sila’y laing hugna nga ihatag ngadto sa dugang mga pamilya nga apektado sa sunog sa sunod semana.
Si Basmayor nagkanayon nga base sa kamandoan sa mayor ang mga apektado nga pamilya makadawat og mga food packs gawas sa relief boxes.
Ubay-ubay na usab nga mga ayuda ang nadawat sa mga nasunogan gikan sa mga ahensiya sa gobiyerno sama sa DSWD ug uban pa.
Ang mayor nibisita na usab sa maong dapit diin gipahigayon ang re-blocking diha sa lugar.
Sayo pa, 207 ka pamilya ang apektado sa pag-ulbo sa maong sunog diin ang uban kasamtangang nagpasilong diha sa City Central National High School ug adunay nipili nga magpasilong sa ilang mga kaparyentihan. — /BDB (BANAT NEWS)