CEBU, Philippines — Si Mayor Michael Rama sa Dakbayan sa Sugbo mapasalamaton sa Barangay Environmental Officers sa dako nilang tabang sa siyudad atol sa gipahigayon nga orientation seminar niadtong adlaw’nga Biyernes nga gipahigayon diha sa Cebu City Hall executive building.
Nasayran nga gatusan ka BEO ang niapil sa maong seminar nga nagtudlo kanila sa lain-lain nga mga ordinansa og existing laws nga nagpahamtang og silot ngadto sa magpataka og labay sa ilang mga basura.
Atol sa seminar ang mga BEO gipahinumduman usab sa mayor sa kaimportante sa ilang role sa pagmentinar sa kalimpiyo og kahapsay sa siyudad.
Ang maong panagtigom naghatag og kahigayonan sa mga BEO nga makat-on sa mga palisiya ug regulations sa siyudad kalabot sa waste management and disposal, proper segregation of waste, schedules sa mga pagpangolekta ug penalties sa mga malapason.
Ang mayor nidasig sa mga BEO sa pagtrabaho tungod kay dako sila og papel sa pagpabilin sa kalimpiyo ug kaluwasan sa mga residente.
Ang pangulo sa Cebu City Environmental Sanitation and Enforcement Team Grace Luardo nipahinumdum sa mga nanambong nga BEO nga isulod sa kasing-kasing ang balaod tungod kay gamit kaayo kini sa ilang trabaho.
Ang hepe sa Cebu City Environmental and Natural Resources Office Reymarr Hijara nipadayag sa kamahinungdanon sa pagtinabangay aron makab-ot ang environmental protection and sanitation. — /BDB (BANAT NEWS)