Magtiayong nagmotor napunggit sa pasaheroan

CEBU, Philippines — Usa ang namatay ug usa usab ang grabeng naangol sa panagbangga sa duha ka mga sakyanan  nga nahitabo duol  sa Gate 1 sa MEPZ 1 sa dalan M.L. Quezon sa Barangay Ibo, Siyudad sa Lapu-Lapu alas 10 pasado sa buntag kagahapon adlaw nga Lunes Abril 8, 2024.

Ang namatay giila nga mao si Desederio Pongcol Torregosa,  64, nga maoy nagdala sa motorsiklo ug naangol usab ang angkas niini nga iyang asawa nga si Susan Oppus  Torregosa,  64, nga pulos molupyo sa Sitio Sta.  Maria sa Barangay Pusok sa maong siyudad.

Sa nasayran gikan ni Police Lieutenant Colonel Christian Torres, tigpamaba  sa Lapu-Lapu City Police Office (LCPO)  nga  gikasugat  sa mga biktima ang multicab nga pasaheroan nga gimaneho sa usa ka molupyo sa Soong 1 sa Barangay Mactan sa maong dakbayan kansang pangalan gipugngan sa kapolisan.

Matud pa ni Torres mikawat sa lane nga ilang gisubay nga maoy hinungdan sa ilang panagbangga ug nangalagpot ang magtiayon sa karsada.  Patay na pagabot sa tambalanan si Desidirio samtang giatiman pa ang kapikas niini. (BANAT NEWS)