Nagbinastos gidakop
CEBU, Philippines — Gidakop ang usa ka 57-anyos nga lalake human nasakpan nga nagduwa sa iyahang kinatawo kilid sa gate sa Tejero Elementary School kagahapon sa buntag, Lunes, Marso 25,2024.
Ang suspek nga 57-anyos nga lalake residente sa McArthur Boulevard, Barangay Tinago, Siyudad sa Sugbo.
Nasayran nga gidakop ang maong lalaki sa security guard sa nahisgutang tughaan human gisumbong sa 32-anyos nga babaye nga taga T. Padilla ning siyudad.
Ang babaye mipasangil nga nagduwa ang suspek sa iyahang kinatawo ug gipabuto kini sa iyahang sampot.
"Natingala man gud ko nganong akong likod, naay init. And then, basa akong likod. ‘Nya maklaro man gyud nimo nga naay kuan sa akong likod kay black man ko,” saysay sa biktima nga nahinabi sa DYSS Super Radyo Cebu.
Dihang nadakpan sa gwardiya ang maong lalake gidala kini sa Waterfront Police Station. Ang suspek sa iyang bahin miangkon sa pasangil ug nangayo kini og pasaylo sa biktima.
Miangkon sab kini matod pa nga ikaduhang higayon na niya nahimo ang maong law-ay nga binuhatan. "Nablangko ko, wala ko kabaw unsa akong gihimo,” sa suspek pa.
Si Police Major Efren Diaz Jr., hepe sa Waterfront Police Station nagkanayon nga mohimo sila og imbestigasyon sa background sa dinakpan.
“Sabi nga ng pamilya na may mental illness ang suspect pero wala silang maipakitang mga record ng ospital,” sigon ni Diaz.
Desidido matod pa ang biktima nga mopasaka og kasong kalapasan sa Republic Act 11313 kun Anti-Bastos Law aron kini motagam. (BANAT NEWS)
- Latest
