CEBU, Philippines — Gitanggong karon sa sulod sa detention cell ang usa ka barangay responder sa Lungsod sa Compotela nga namusil sa gigukod niining kapuyo apan ang barangay konsehal maoy iyang matud pa naigo.
Ang napusilan mao ang Konsehal sa Barangay Magay nga si Vicente Murillo, kinsa naigo sa liog ug gidala sa tambalanan.
Nahitabo kini alas-7 pasado ang takna sa miaging Sabado sa gabii sa Purok Bayabas sa Barangay Poblacion sa Lungsod sa Compostela.
Sa imbestigasyon sa kapolisan, nagselos ang kapuyo niini nga lalaki sa maong suspek nga responder nga giilang mao si Emiliana (di tinuod pangalan), 45-anyos. Daw gisamukan ang responder sa pangabubho sa kapuyo ug wala na makapugong sa iyang kasuko giingong mikuha kini og armas nga kalibre .38.
Dalidaling mikaratil og dagan ang nangabubhong kapuyo pagkamatikod nga nasuko na ang babaye ug dalidaling migawas ug misutoy sa pagdagan pahilayo.
Apan gikatahong gigukod niini ang kapuyo ug gipusil kini sa makadaghang higayon. Si Murillo nga nagbarog sa maong dapit naigo sa iyang liog.
Ang suspetsado dali nga gidakop nila ni Police Captain Lino Tryss Galvan III, hepe sa Compostela Police Station ug gikatakdang pasakaan og kaso. (BANAT NEWS)