ECC gihangyo pagsumiter og master development plant sa landfill

CEBU, Philippines — Nipasar og laing resolusyon ang konseho sa Dakbayan sa Sugbo nga naghangyo sa Expedition Construction Corporation nga mosumitir og master development plan sa Pond A ug redevelopment sa kanhi landfill sa Barangay Inayawan ngadto sa konseho.

Gikataho nga ang maong resolusyon nga naglaraw sa pagkuha sa status sa plano pinaagi sa Joint Venture Agreement ang naduso na kaniadto ni Cebu City Councilor Rey Gealon.

Niadtong Enero 2022, ang kagamhanan sa siyudad ug Expedition Construction Corporation (ECC) nigama og JVA alang sa pag-reclaim sa Pond A ug redevelopment sa kanhi landfill sa Barangay Inayawan.  Ubos sa maong resolusyon gilaomang masubmiter ang master development plan sa kataposang bahin sa buwan o sa unang semana sa Abril karong tuiga.

“Once reclaimed and fully developed, Pond A and the former landfill can generate a total of 75 hectares of land”, tipik sa resoluson.

Niadtong Oktubre 16, 2023 gikataho nga ang Cebu City Council nihangyo sa Office of the Mayor ug uban pang mga buhatan sa pagsumiter og status sa report sa JVA Expedition Construction Corporation.

Kini human sa privilege speech ni Konsehal Mary Ann Delos Santos usa ka semana human sa appearance ni Mayor Michael Rama sa session niadtong Oktubre 4, 2023.

Giaprobahan sa konseho ang motion ni Konsehal Nestor Archival alang sa pagmugna og Ad Hoc Committee nga magbuhat og rekomendasyon kabahin sa JVA.  Nasayran nga niadtong Enero 27, 2022 napirmahan ang JVA apan wala pa masugdi ang proyekto diin usa ka tuig na ang nakalabay. — /BDB (BANAT NEWS)