Archival andam supakon ang implementasyon sa revised RPT
CEBU, Philippines — Si Cebu City Councilor Nestor Archival, Sr. nipadayag nga andam niyang supakon ang implementasyon sa amendasyon sa Real Property Tax (RPT) code diin ubos na kini karon sa second deliberation.
Kagahapon si Archival uban ni kanhi mayor Tomas Osmeña ang nipatawag og press conference diin gipadayag niya ang pagsupak sa implementasyon sa revised RPT.
Ang maong lakang tubag sa mga panawagan ni Mayor Michael Rama sa pag-implementar sa revised RPT sa dili pa matapos ang buwan sa Marso.
Matud ni Archival nga human gisugyot ang pag-revised sa RPT niliyok siya sa mga barangay, nagkalain-laing sektor ug sa mga religious leader aron matabangan sila sa ilang baroganan sa nahisgutang sugyot.
Gibutyag ni Archival nga 95 porsyento sa iyang naestorya nipadayag nga wala pa sila maka-recover ug dili nila makaya ang bayranan kong patas-an ang RPT.
Gisusi usab ni Archival ang datos sa City Treasurer’s Office sa nilabay’ng lima ka tuig diin ang nakolektang buhis niabot lang sa maximum nga P8.4 bilyones.
Atol sa nilabay’ng session, si Archival nipadayag sa iyang posisyon ug matud niini nga kong maimplementar ang revised RPT walay kasigurohan nga ang nakolekta nga P8.4 bilyones maabot kinit ungod kay ang mga magbubuhis maglisod sa pagbayad gumikan sa kinalit nga pagsaka.
Si Archival nagkanayon nga ipadangat niya ang maong argumento sa konseho atol sa second hearing nga gikatakda sa sunod semana. The Freeman
- Latest
