CEBU, Philippines — Moabot sa P67.1 milyones ang gibubo nga tabang pinansyal sa Probinsya sa Sugbo sa pito ka lungsod sa ikapitong distrito sa lalawigan.
Si bise gobernador Hilario Davide III maoy nangulo sa paghatag sa maong ayuda ngadto sa mga mayor, bise mayor, konsehal ug mga barangay kapitan sa lungsod.
Ang lungsod sa Boljoon ug Alcoy nakadawat og P9.7 million matag usa. Ang LGU Argao nakadawat og P10.7 million; tag P9.85 million sab ang Dalaguete ug Samboan; P9.2 million sa Santander ug P8.1 million sab ang sa Oslob.
Ang maong pondo magamit sa mga LGU sa ilang ipatuman nga proyekto sa imprastraktura.
Sa pag suroy sa mga opisyal sa Kapitolyo sa habagatang Sugbo, gipangulohan ni gobernador Gwendolyn Garcia daghan sa mga pasilidad og edipisyo ang gibuksan o gi-inagurahan.
Sa lungsod sa Samboan, giablihan balik ang Museo de Samboan human gipaubos sa rehabilitasyon nga migasto og P4 milyones.
Gibuksan usab ang Tourism Information and Trade Office sa maong lungsod niadtong Marso 12. Ang maong 135-metro kwadrado nga pasilidad anaa nahimutang sa barangay Poblacion sa lungsod sa Samboan nga gigastohan usab og P7 million.
Giinagurahan sab ang Phase 1 sa Samboan Public Market niadtong Marso 12 diin mokabat sa P18 milyones ang nagasto. Sumala sa Kapitolyo, P10 million niini gikan sa Probinsya.
Ang Kapitolyo mogahin og laing P10 million alang sa Phase 2 sa maong merkado.
Samtag libre nga mga serbisyo ang gidalit sa kagamhanan sa Dakbayan sa Talisay alang ngadto sa mga senior citizen.
Si mayor Gerald Anthony “Samsam” Gullas nidalit sa serbisyo sa pagparehistro o crorrection sa ilang estado sa opisina sa Commission on Election (COMELEC).
Lakip na ang PhilHealth registration, libre nga facial, tupi, manicure,pedicure ug masahe.
Ang kalihukan gisubay sa GrandParents Day nga gisaulog kagahapong adlawa. (BANAT NEWS)