CEBU, Philippines — Moabot sobra P15 milyones nga balor sa illegal nga drugas ang nasakmit sa hiniusang operasyon sa kapolisan sa managlahing anti-illegal drugs operations niadtong nakalabay nga adlaw nga Domingo.
Sa lungsod sa Dauis sa Bohol, nasikop sa Dauis Police Station, Provincial Intelligence Unit sa Bohol Police Provincial Office (BPPO) ang usa ka bigtime drug pusher sa Purok-5, Barangay Mayacabac alas-5 sa hapon sa adlaw'ng Domingo.
Ang 32 anyos nga dinakpan giingong High Value Individual residente sa San Isidro, Tagbilaran City, nakuhaan kini og 2.150 kilong gituohang shabu nga nagkantidad og P15 million.
Sa report sa Dauis Police Station pinangulohan ni Police Lieutenant Thomas Zen Cheung, sobran duha ka semana nilang gipanid-an ang kalihokan sa suspek human sila makadawat og impormasyon nga namaligya kini og ilegal nga drugas.
Nasayran nga napriso na niadtong 2016 ang dinakpan tungod gihapon sa kalambigitan sa illegal nga drugas apan nakagawas human nag plea bargain niadtong nakalabay nga tuig.
Ang kapulisan padayon pa nihimo sa ilang imbestigasyon batuk sa dinakpan ug kung asa kini padulong ang mga nasakmit nga drugas tungod kay daghan kaayong silang nadawat nga reklamo bahin niini.
Sa laing operasyon nga gihimo sa Provincial Intelligence Unit ug Talisay City Police Station sa Cebu Police Provincial Office (CPPP), nadakpan diha sa Sta. Lucia Road, Barangay Bulacao, Dakbayan sa Talisay niadtong Domingo sa gabii ang 29-anyos nga maoy subject sa operasyon ug ang kakunsabo niining 38-anyos.
Nakuhaan sila og 40 gramos nga illegal nga drugas nga mobalor og P272 mil.
Samtang sa Lungsod sa Lilian, nadakpan ang usa ka construction worker ug laing kauban niini sa Purok Banika, Sitio Sambag, Barangay San Vicente sa maong lungsod ug nakuhaan og 5.55 gramo nga shabu nga nagkantidad og P37, 740.
Ang Lapu-Lapu City Police Office (LCPO) nakadakop sab og lima ka street level drug pushers sa usa ka semana nga operasyon nga nagsugod sa Pebrero 11 hangtod sa Pebrero17, 2024.
Si Police Lieutenant Colonel Christian Torres, tigpamaba sa LCPO nga niabot tanan og 11.25 gramo nga shabu ang ilang nasakmit gikan sa lima nga mokantidad og P70, 500.— Decemay Padilla, Rowena Capistrano, Romeo T. Limpangog (BANAT NEWS)