CEBU, Philippines — Nawingig ang usa ka sakop sa City of Talisay-Traffic Operation Development Authority (CT-TODA) human siya naigo sa kumo sa gwardya nga gituhuang hubog didto sa UP lot, Barangay Mohon, Dakbayan sa Talisay niadtong Martes sa hapon.
Si Jonathan Tumulak, pangu sa CT-TODA nibutyag nga nagmaneho sa iyang motorsiklo si Silvano Torrefranca, 41 anyos nga taga Purok Tabay, Barangay Tunghaan, Minglanilla.
Apan sa iyang pagbiyahe nakasaghid kini sa laing motorsiklo.
Inay nga mopundo aron mahusay ang panagbangga nisutoy kini sa pagpadagan.
Matud pa ni Tumulak nga gialarma nila si Torrefranca hangtud nga napara.
Sa dihang giduol siya sa enforcer nga si Jessie Tabuga, 46 anyos kalit lang kini nga nanumbag ug maayong pagkaigo sa aping si Tabuga.
Gituohan nga hubog ang suspek samtang nagmaneho sa iyang motorsiklo.
Gikatakdang pasakaan og kaso nga direct assault, disobediecne ug reckless driving ang suspetsado. (BANAT NEWS)