CEBU, Philippines — Miabot ngadto sa 30 ka parisan ang nahigtan ang panaghigugmaay atubangan sa Ginoo pinaagi sa usa ka mass wedding sa simbahan nga giselebrar ni Rev. Fr. Patrick Dalangin niadtong adlawng Martes, Pebrero 13, didto sa St. James the Greater Parish Church sa dakbayan sa Dapitan, Zamboanga del Norte.
Si Apple Marie A. Agolong, ang Tourism Officer sa makasaysayanong "Shrine City" sa Pilipinas, nagkanayon nga mao kini ang ikaduhang "Kasalang Bayan" nga gipasiugdahan sa lokal nga kagamhanan sa siyudad sa Dapitan ubos sa liderato ni Mayor Seth Frederick "Bullet" P. Jalosjos, nga mibarog nga principal sponsor sa mga gikasal kauban ang pipila ka mga opisyales sa dakbayan.
"All of them really went through the process of coming up with the usual requirements, from pre cana to confessions and all leading to the church wedding," matud pa ni Agolong.
"It is just one of the many social services by Jalosjos for the upliftment of the way of life of the Dapitanons," dugang pa ni Agolong.
Pinaagi niining dalaygon nga kalihukan, kadtong mga paris nga nangandoy nga makasal apan dili makabuhat sa ingon tungod kay walay ikagasto nahatagan og bulawanong oportunidad nga mabendisyonan ang ilang panag-uban pinaagi sa sakramento sa kasal sa talagsaon ug dili mahikalimtan nga paagi.
Gawas sa ilang pagpanumpa nga respetohon ug mahalon ang usa'g-usa sa tibuok nilang kinabuhi, ang mga opisyal sa Dapitan nanghinaut nga ang mga managtiayon motukod sab og usa ka lig-ong pamilya sa tagsa-tagsa nila ka mga panimalay kay kinahanglan man kini sa pag-ugmad ug paglambo sa ilang dapit.
Gikalipay og maayo sa mga gikasal ang halandumon nga kahigayonan nga gihatag sa siyudad sa Dapitan. (BANAT NEWS)