Buwad Bouquet sa Taboan karong Valentine’s Day

CEBU, Philippines — Agi og pagsakay sa okasyon, ang Taboan Public Market sa Cebu City nagtanyag og “Buwad Bouquet” sa ilang mamalit og buwad sa maong merkado karong adlawa sa Valentine’s Day.

Ang Sweet and Salty Valentines ang matilawan sa mga gustong magpalahi karong okasyona, inay buwak, buwad ang ipaambit nga regalo sa ilang mga partners.

Kini ang pakulo karon sa Barangay San Nicolas Proper nga gipangulohan ni Kapitan Clifford Jude Niñal uban sa mga nanginabuhi og buwad sa ilang Barangay.

Ang sa bouquet adunay boneless danguet, sweet fish tapa ug uban nga magdepende sa request sa mga mopalit. Ang presyo niini magagikan sa 500 pesos ngadto sa  2 mil ka pesos.

Gihulaway kini nga mas practical kay makaon ug dili usab dali mahurot kay mahimo man tipigan for healthy reason sumala pa sa manindahay nga si Esther Ceballos.

Si Niñal, nitug-an nga buot nilang i-level up ang Taboan matag dunay okasyon aron makapailin-ilin ang mga tawo.

Dugang pa ni Ninal, aduna silay Buwad Festival sa ilang barangay apan duna silay plano nga paninduton pa kining Buwad Bouquet  sa sunod tuig. Plano nila nga himuon kini kompetisyon.

Sa pikas bahin, misirit og saka ang presyo sa mga buwak diha sa Carbon Public Market sugod palang kagahapon bisperas sa  Valentine’s Day.

Aduna gayud pagumento sa presyo sa nagkadaiyang mga buwak sama sa Rosas nga gikan sa 400 pesos  ngadto sa  600 pesos ang pungpong. Layo kaayo sa presyo sa ordinaryong mga adlaw nga magagikan lang og 80 pesos ngadto sa 300 pesos ang dosena.

Gipasabot sa mga negosyante nga mahal nang daan gikan sa supplier ang presyo nga ila ra usab gipatungan.

Adunay mga bouquet sa mga buwak gikan sa 500 pesos hangtud 2,500 pesos magdepende kini sa gidak-on ug matang sa buwak ug uban nga desinyo. --  IBM BANAT NEWS