CEBU, Philippines — Niabot ngadto sa 500 ka panimay nga anaa diha sa Bulacao River ang priority sa gobiyerno alang sa resettlement kini human sila gipaubos og profiling sa Task Force Gubat sa Baha.
Matud pa ni Retired Army Colonel Jefferson Omandam, TF GsB Bulacao River commander nga ang iyang team niadtong Enero 30, 2024 nahuman na sa pag tagging sa mga panimalay.
Gibutyag ni Omandam nga nahibalo na sila kong kinsa kining mga residente nga nanimuyo sa maong dapit ug ang gikinahanglan alang sa pagpabalhin kanila sa housing facilities nga tukoron sa siyudad.
Ang siyudad nagtinguha sa paghimo og medium-rise buildings alang sa socialized housing pinaagi sa Public-Private Partnership diin himuon kining pinuy-anan sa mga mapaapektohan sa clearing sa mga suba.
Si Omandam nagkanayon nga samtang nagpaabot pa sa mga relocation ang ilang focus karon ang river maintenance ug pagpahimutang sa mga bio-fences nga magsilbing garbage-collecting barriers.
Matud usab ni Omandam nga ang Bulacao River troopers aktibo kining nakiglambigit sa pagmentinar sa bio-fence nga mag-contain sa non-biodegradable nga basura nga ilabay diha sa kasapaan.
Ang team ni Omandam nakig-alayon kini sa mga bag-o ug gisublian nga mga barangay official sa mga barangay diin nasakop ang Bulacao River alang sa himuon nga comprehensive river rehabilitation project. BDB BANAT NEWS