CEBU, Philippines — Ang Department of Veterinary Medicine & Fisheries (DVMF), ug uban pang animal rescue organizations nagpakita sa ilang suporta sa gisugyot nga ordinansa sa paggamit og mga microchips para sa binuhing mananap ug sa pagparehistro aron mas mamahimong responsable ang mga namuhi niini.
Atol sa regular session sa Konseho sa Dakbayan sa Sugbu niadtong Miyerkules dungan sa public hearing ang gisugyot nga ordinansahon ni Cebu Councilor Rey Gealon.
Ang ordinansahon nag-ulohan og: "An ordinance mandating the use of safe animal microchip in the registration of pets in the territorial jurisdiction of Cebu City and appropriating funds thereof.”
Matud ni Gealon, pinaagi sa pagbutang og microchips sa tanang pets makatabang sab pag-ila kun kinsa ang tagiya niini ug masiguro nga bakunado sab kini.
“In that way, I note that these animals are secure rabies-wise among other benefits this is consonance with city ordinance 25, 26 otherwise known as Animal Welfare ordinance of Cebu City particularly this proposed ordinance is to require the use of microchip of all pets,” sigun pa ni Gealon atol sa session.
Ang presidente sa Island Rescue Organization (IRO), Analyn Aizpuru, mibarog atubangan sa konseho ug nipadayag sa ilang suporta sa maong ordinansa.
Matud niya, samtang kaya ra sa bulsa ang P50 nga registration fee, dili tanan kayang mobayad para sa pagpakapon o pagpa-ligate sa ilang pets. Atol sa diskusyon, si ex-officio councilor Franklyn Ong kinsa mibarog usab isip Liga ng mga Barangay (LNB)-Cebu City President mipadayag nga adunay libreng spay ug neuter services sa barangay.
Apan si Aizpuru miingon nga kinahanglang pangusgan kining spay ug neuter sa mga barangay aron makapahimulos ang mga kabus.
Si Penelope Montalban, representante sa Cats and Dogs Matter Organization nipadayag usab sa ilang suporta sa gisugyot nga ordinansa ug midugang nga kini usa ka "laudable."
Matud niya, tukma sa panahon nga gikonsiderar nga adunay daghang mga "stray animals" nga adunay tag-iya apan wala narehistro.
“But because the owner, are not, shall we say responsible enough or not aware of the responsibilities, the micro chipping will definitely be a big help in leveling them up in being a responsible pet owner,” matud niya. – /IBM (BANAT NEWS)