Kagawad ug ‘kabit’ gipadakop ni misis

CEBU, Philippines — Giaresto ug giposasan ang  usa ka Barangay Kagawad sa usa sa mga barangay sa Cebu City ug ang giingong kulokadidang niini sa mga sakop sa Mandaue City Police Office Station 4 sa us aka hotel nga ilang gi-check inan diha sa dalan Hernan Cortez sa Mandaue City niadtong Biyernes sa gabii.

Ang hepe sa maong police station nga si Police Major Mikhail Mangawang Mallorca maoy nangulo sa pagdakop sa duha.

Ang gidakop nga kagawad nagpangidaron og 41 anyos samtang ang iyang kaubang babaye usa na ka senior citizen kay nag-edad na kini og 60 anyos ug kini usa ka biyuda.

Base sa report sa kapolisan, gikatahong midangop sa ilang buhatan ang asawa sa kagawad ug nangayo og police assistance.

Ang ginang mitug-an sa mga polis nga iyang nasundan iyang bana ug ang giingong babaye nga mi check-in sa usa ka hotel sa naasuy nga dapit ug buot niya silang duha dakpon sa akto.

Tuod man, wala maglangay ang kapolisan uban ang mga policewomen sa WCPD sa maong estasyonan giadto dayon sa lugar. Sa pagabot sa kapolisan sa lugar ug inabagan sa kawani sa maong hotel ilang gipaablihan ang lawak diin nag-check in ang duha ug didto nasakpan sila sa ilang gipangbuhat.

Dihadiha gidakop ang duha ug gidala ngadto sa police station.

Apan sa pakighinabi ngadto sa kagawad, kini mitug-an nga pito na sila ka tuig nga minyo sa iyang asawa, apan nianang mga tuiga wala silay laing gibuhat kondili ang pagsige og away. Matud niya dili malinawon ang ilang pagpuyong magtiayon.

Apan siya mihimakak sab sa pasangil nga duna silay dautang gibuhat sa 60-anyos nga biyuda, matud pa niya ‘business meet’ ang ilang tumong sa panagkita kay naghisgot sila bahin sa negosyo.

Ang asawa sa kagawad sa dihang gisuwayan og kuha og habig sa Banat News team nagdumili kini sa pagtubag.

Ang duha ka mga dinakpan gidala sa Casuntingan Police Station 4  ug gikatakdang pasakaan og kasong Concubinage ug Adultery ubos sa Revised Penal Code  Art. 344. (BANAT NEWS)