Motorbanca sa fluvial nalunod

CEBU, Philippines — Naunlod ang usa ka motorbanca human kini nabanggaan sa laing motorbanca diha sa kadagatan sa baywalk area sa South Road Properties sa Cebu City sa dihang padung na sila modunggo gikan nikuyog sa fluvial procession sa Balaang Bata kagahapon.

Matud pa nga naunlod ang walay pangalang motorbanca samtang nagpadung na panganaog ang mga sakay nga upat ka deboto sa dihang aksidente kining nabanggan og laing motorbanca nga M/B Dins Sea.

Niresulta kini nga nabuslot ang parka sa nabanggaan ug diha misulod ang tubig maong hinay-hinay kining naunlod.

Sa report sa Coast District Central Visayas ang wala’y ngalan nga motorbanca dunay sakay nga unom ka tawo, upat niini ang pasahero ug ang duha mao ang Kapitan nga si Gaudencio Mellino Jr., 34, taga Pangan-an, Isla sa Olango, dakbayan sa Lapu-Lapu ug ang crew member niini.

Ang M/B Dins Sea gipag-iya ni Geraldine Mante, 41 , ug ang boat captain mao si Ramonito Baron, 62, residente ra sab sa Isla sa Olango, Lapu-Lapu City ug duna kini sakay nga tulo ka crew.

Wala hinooy naangol sa maong hitabo tungod kay ang mga pasahero nga sakay sa naunlod nga motorbanca nakalangoy ngadto sa laing motorbanca ug nahatod sa kabaybayonan.

Matod pa nagkasabot ra ang duha ka habig nga bayaran ang pagpaayo sa naunlod nga motorbanca nga gidala una sa Shell Island.

Sigon sab ni Commander Mark Larsen Mariano, Deputy Commander sa Coast District Central Visayas nga wala’y oil spill nga nahitabo sa dapit sa nahitaboan. (BANAT NEWS)