Replica ni Padre Pio midangat na sa iyang santuario

CEBU, Philippines — Hingpit nang niabot ang replica ni St. Padre Pio de Pietrelcina gikan sa San Giovanni Rotondo, Italy sa iyang sanctuary nga nahimutang sa may Tanay, Barangay Pulangbato, bukiran nga bahin sa Dakbayan sa Sugbo, kagahapon sa buntag, human kini nipundo sulod sa Cebu Metropolitan Cathedral.

Ang maong replica ni St. Padre Pio de Pietrelcina, ni abot niadtong Biyernes, Enero 5, 2023 ug gidala sa Our Lady of the Sacred Heart Parish-Marigondon diin nipundo kini og usa ka adlaw dayon gidala sa Cebu Metropolitan Cathedral diin gipanguluhan ni Cebu Archbishop Jose Palma pagpahigayon og Santos nga misa.

Kagahapon sa buntag gikan sa Cebu Metropolitan Cathedral ang replica gidala na sa iyang permanente nga sanctuary nga nahimutang sa Santuario di Padre Pio sa Barangay Pulangbato.

Bisan pa sa pagbunok sa kusog nga uwan wa matarog ang mga magtutuo nga nag-atang sa pag abot sa replica.

Gipahigayon ang ribbon cutting and blessing sa sanctuary nga gipangulohan ni Msgr. Roger Fuentes ang team Moderator sa Team of Pastor sa San Nicolas De Tolentino og Spiritual Director sa Contemplative community of St. Padre Pio.

Ang imahen ni San Padre Pio gibutang sulod sa usa ka bildo ug anaa usab ang buhok niini.

Gihimo usab sa kapilya kilid sa santuario ang healing prayer. Matud pa ni Dr. Richard Saing, head servant contemplative community of St Padre Pio nga bukas ang maong dapit dili lang sa mga Sugbuanon apan sa tanang katawhan tibuok kalibutan.  MEL BANAT NEWS