CEBU, Philippines — Patay ang usa ka 16-anyos nga batan-on ug naangol ang laing 13 anyos dihang kalit silang gipamusil sa 17-anyos nga nasuya kanila kay adto nanuol ang pundok sa mga babayeng iyahang naibgan sa sulod sa gipahigayong disko diha sa Sitio Lahing-Lahing, Barangay Mabolo, siyudad sa Sugbo niadtong Biyernes sa kaadlawon.
Nadakpan ra hinuon dayon sa mga sakop sa Mabolo Police Station ang suspetsado nga nag-edad og 17 anyos, residente sa Ludo Cemetery, Barangay Carreta ning siyudad.
Matud ni Police Major Eraño Regidor, hepe sa Mabolo Police Station sa Cebu City Police Office (CCPO), fiesta sa maong lugar mao nga adunay gihimong disko aron malingaw ang mga tawo ug mga bisita.
Apan tungatunga sa kalingawan, niulbo ang kagubot tali sa grupo sa suspek ug sa mga biktima. Gikatahong nasuya ang suspek kay adto sa grupo sa mga biktima niduol ang mga babayeng ilang naibgan.
Aron paglikay sa gubot, namauli ang grupo sa mga biktima apan gikatahong adunay nisinggit kanila nga magbantay kay dunay migukod kanila.
Sa kuha sa CCTV footage nga nakuha sa Mabolo Police Station ang suspetsado nagsakay og motorsiklo nga migukod sa mga biktima.
Dihang iyaha silang naabtan, nanaog kini sa motor maong nagiyahay og panagan ang grupo sa mga biktima. Dihadiha gikatahong nagpataka og pusil ang suspek sa grupo ug maayong pagkaigo sa duha.
Dunay tulo ka saksi nga mga kauban sa mga biktima nga positibong mitumbok sa nasuya nga 17-anyos nga mao gyuy namusil kanila.
Kasong murder ug frustrated murder ang ipasaka batok sa dinakpan samtang gisusi pa kun kinsa iyang mga kaubanan nga nalambigit sa maong krimen. (BANAT NEWS)