CEBU, Philippines — Mihangyo si Cebu City mayor Michael Rama nga hatagan sila og higayon human nagpabilin ang iyang baruganan nga sa South Road Properties ipahigayon ang Sinulog Grand Parade karong sunod tuig.
Matud pa sa Mayor, hugot na ang iyang desisyon bisan og daghan man ang supak niini lakip na si Cebu Governor Gwendolyn Garcia og pipila ka mga mayor sa probinsya sa sugbo.
Malaumon si Rama nga respitohon ang iyang desisyon isip leader sa Highly Urbanized City.
Dugang pa ni Rama nga dili gayud luwas ang venue sa Cebu City Sports Center para sa Sinulog kon itandi sa SRP nga lapad kaayo ang lugar.
Ang mayor nipasalig nga atimanon ang tanang mga concern may kalabutan sa venue sama sa mga portable toilets nga gamiton sa mga bisita og mosaksi sa kalihukan, supply sa tubig og uban pa.
Sa nasayran daghan ang nisugyot nga ibalik sa Cebu City Sports Center ang Sinulog Grand Parade 2024. (BANAT NEWS)