Patay nga lawas sa 16 anyos nga lalake nailhan na

CEBU, Philippines —  Nailhan na ang patay'ng lawas sa usa ka lalaki nga napalgan sa sitio Buliring sa Barangay Abuayan Lungsod sa Balamban.

Giila sa kapolisan ang lalake nga mao si John Mahinay, 16 anyos nga taga sitio Immaculada, Barangay Nangka sa nahisgutang lungsod.

Si Police Lieutenant Colonel Joey Bicoy, hepe sa kapolisan sa lungsod sa Balamban miingon nga ang pamilya sa biktima maoy miila niini sa gihimong pakisusi sa nahimutangan sa patay nga lawas diha sa usa ka punerarya

Matud pa ni Bicoy nga nakabaton og samad sa iyang nawong ang biktima nga ilang gituohan nga maoy hinungdan sa iyang kamatayon.

Napalgan usab sa lugar nga nahitaboan ang basiyo sa ilimnong makahubog ug ilang gituohan nga nag-inom kini sa wala pa mahitabo ang pagpatay niini.

Sa dugang pakisusi nga ilang gihimo suma pa ni Bicoy nga maoy ilang nasayran nga ang namatay usa ka notadong kawatan sa maong dapit. (BANAT NEWS)