CEBU, Philippines — Motabang ang Highway Patrol Group (HPG) sa mga lokal nga kapolisan sa rehiyon sa pagpahigayon og border control ug checkpoint operations aron malikayan ang pagsaka sa kaso sa kawat sa mga sakyanan.
Ang maong lakang sa HPG-7 pagsanong sa kamanduan ni Police Regional Office (PRO)-7 Director Brigadier General Anthony Aberin atol sa ilang Command Conference sa miaging adlaw.
Giklaro sa Regional Chief sa HPG-7 Police Lieutenant Colonel Wilbert Parilla nga wala’y pilion mapa sakyanan man o motor susihon gyud.
Nagpahinumdom si Parilla sa katawhan nga magbinantayon sa pagpalit og second hand nga sakyanan, kung mopalit og second hand nga sakyanan labing maayo nga ipasusi una sa ilang buhatan kung dili ba kini kinawat.
Angay nga magduda kung ang sakyanan gibaligya nga barato ang presyo bisan bag-o pa kini nga model. — IBM (BANATNEWS)