Suroy-suroy sugbo mas engrande karon

CEBU, Philippines — Gisaad sa mga mayor sa habagatang Sugbo nga mas engrande ang umaabot nga Suroy-Suroy Sugbo Southern Heritage Trail.

Atol sa tigom ni Gobernador Gwendolyn Garcia uban sa mga mayor sa Southern Cebu, ang mga mayor nagkanayon nga nangandam sila pag-ayo alang sa maong tourism caravan nga gikatakda Nobiyembre 30 ngadto sa Disyembre 2.

Sumala sa Provincial tourism officer nga si Marti Ybañez nga gibanabana nga 400 ka mga guest ang moapil sa tulo ka adlaw nga tour ug aduna usab dili momenus lima ka mga bus nga maoy motransport o sakyan sa mga partisipante sa tibook nga tourism caravan.

Aduna pud coaster nga giandam alang sa mga bisita gikan sa South Korea.

Ang Southern Heritage Trail magsugod sa Capitol grounds dayon diritso sa lungsod sa Minglanilla kon asa ang first stop dayon sa San Fernando, Sibonga hangtud moabot sa Santander.

Ang Suroy-Suroy Sugbo usa ka flagship tourism program sa administrasyon ni Garcia kon diin ang mga LGUs suroyon sa mga bisita. Higayon kini sa kalungsoran aron mapakita ang ilang tradisyon ug kultura lakip na ang sikat nga tourism destination ug mapatilaw ang ilang gipasigarbo nga pagkaon ug delicacies.