CEBU, Philippines — Alerto na ang mga sakop sa Search and Rescue (SAR) sa Dakbayan sa Talisay.
Kini maoy gibutyag ni Police Lt. Col. Wayne Magbanua, hepe sa kapolisan sa Talisay.
Asoy pa niya nga usa ka team ang alerto kung adunay mga panghitabo may labot sa nagdanga-danga nga bagyo.
Sila sab ang moasistar kung pananglit adunay mga force evacuation nga pagahimoon.
Sa lungsod sa Minglanilla, namutol ug nagtrim sa mga kahoy ang mga sakop sa Minglanilla Disaster Risk Reduction and Management Office (MDRRMO).
Ila sab nga gilimpyohan ang mga kanal diha sa Purok Mansinitas, Lower Lipata nga natabunan na sa mga sagbot ug mga basura nga nasangit.
Tipik sa pagpangandam sa bagyo ang ilang gihimo aron mamenosan o malikayan ang baha ug matumbahan sa mga kahoy kung kusog man gyud ang bagyo nga mosulod sa nasud. (BANAT NEWS)