Seguridad sa OSC kinahanglang palambuon
CEBU, Philippines — Opisyal sa Operation Second Chance miingon nga lisud para kanila ang pagsigurong wala na gyuy mahitabong kagubot, pagpalusot og kontrabando ug pageskapo sa mga batang gikustodiya diha sa maong pasilidad kun dili mapun-an ang mga gwardiya niini.
“Dugay na gyud ko nag request ug additional blue guards kay ang usa ka guard ebutang nato sa taas…Dako man gud kaayo ang Operation Second Chance, so mas nice gyud siya kung nay additional,” si Executive Director Portia Basmayor nagkanayon.
Si Basmayor milingkod sa maong pasilidad niadto lang buwan sa Mayo sumala pa sa News and Information unit sa siyudad.
Sa pagkakaron, ang pasilidad gibantayan karon og mga sakop sa Philippine National Police ug BJMP personnel.
Sa wala pa putla sa siyudad ang kontrata niini sa GDS Security, ang OSC duna lang walo ka gwardiya nga gibahin og kaduha kada adlaw.
Matud pang Basmayor usa sa hinungdan nga duna pa gihapoy mga minor offenders nga nakapalusot og mga kontrabando sama sa sigarilyo ug bisan marijuana.
Gani duna kanilay nakaeskapo tungod gyud sa kakulang sa gidaghanon sa mga gwardiya sa pasilidad. Gusto sab ni n Basmayor nga patas-an pa ang kasamtangang kural aron mas lisod kining katkaton.
“Dugay na sad ko nag request na patas-an and kural or butangag steel matting para matas-an,” dugang pang Basmayor.
Si Basmayor mipahibalo nga nangayo sab siya og tabang sa opisyales sa Barangay Kalunasan nga motabang sa pagbantay sa pasilidas. — /IBM (BANAT NEWS)
- Latest
