Rossel: Security agency gipahibawo sa termination niadtong Oktubre

CEBU, Philippines — Gihimakak ni Attorney Collin Rossel, Cebu City administrator ang mga alegasyon sa GDS Security Agency nga wala sila gipahibawo sa termination sa ilang kontrata ug nidugang nga ang security agency nipasaka pa og kaso batok sa kagamhanan sa Dakbayan sa Sugbo aron supakon ang maong termination.

Sa pakighinabi sa tigbalita kagahapon, si Rossel nagkanayon nga ang kagamhanan sa siyudad kinahanglang kritikal sa pag-atubang sa mga serbisyo sa seguridad diin naglambigit kini sa safety, trust, and confidence. Matud ni Rossel nga gipahibawo na ang termination niadtong buwan sa Oktubre diin nitubag ang maong security agency pinaagi sa pagpasaka og kaso batok sa Cebu City Government ug sa mga empleyado niini.

Gikataho niadtong Miyerkules diin ang tag-iya sa GDS Security Agency nga si Marjorie Anne Sun-Ng nikwestyon sa desisyon sa kagamhanan sa siyudad nga wala sila hatagi og 30 ka adlaw nga notice sa wala pa ang termination.

Si Sun-Ng niadto kini sa Cebu City Hall mga alas 11:00 sa gabii niadtong Martes nunot sa iyang nadawat nga suwat nga opisyal nga matapos ang ilang kontrata isip private security agency sa Cebu City Hall sa samang adlaw, Oktubre 31, 2023.

Nakakiha naman gani sila, let the documents speak , matud ni Rossell kabahin sa pangangkon sa security agency nga ang siyudad wala mohatag sa 30 ka adlaw nga pahibalo.

Matud ni Rossel nga lakip sa mga hinungdan nga ilang gi-evaluate isip basehan sa pagtapos sa kontrato mao ang performance ug mga insidente nga wala pa masulbad.

Kabantay ka ato naay gisumbag nga trabahante?, apil pa sa mga armas, in fact na- found out nato na recently ang armas toa ra sa city hall which is gun ban ron , butyag ni Rossel.

Si Rossel nagkanayon nga ang pagtipig sa mga armas sulod sa city hall angay silotan sa balaod.

Gisusi na sa lokal nga PNP ang 20 ka armas lakip niini ang mga shot gun nga gitipigan diha sulod sa city hall.  (BANAT NEWS)