CEBU, Philippines — Usa ka Japanese national nga nagtuon og English dinhi sa Sugbu ang patay’ng lawas nga napalgan sayo sa buntag diha sa ubos sa Marcelo Fernan Bridge, Barangay Umapad, Dakbayan sa Mandaue adlaw nga Martes.
Ang maong lalaki sayo sa buntag nakit-an nga nag-utaw-utaw nga wala nay kinabuhi apan hapon na sa maong adlaw kini naila sa kapulisan.
Matud pa ni Police Lieutenant Colonel Franc Rudolf Oriol, deputy city director for operations ug tigpamaba sa MCPO miingon nga human sa ilang panagtigum may kalabutan sa maong insidente, nakompirmar nila nga usa kini ka Hapones nga nag-edad og 30-anyos. Wala mohatag og dugang impormasyon ang kapolisan kun giunsa nila pagkahibalo nga kini Hapones.
Wa sab mobutyag ang kapolisan kun dunay na-recover nga ID o passport gikan sa lawas o kung duna bay classmates o opisyales sa iyang eskuylahan nga mikompirmar nga ilaha kining estudyante.
Giingong tinun-an kini og English learning school sa Cebu City ug giingong duna kini depresyon. Ang kapolisan padayon pa sa ilang imbestigasyon ug makigalayon sab sila sa Cebu City Police Office. (BANAT NEWS)