CEBU, Philippines — Gipahigayon kagahapon diha sa Police Regional Office (PRO)-7 ang nationwide multi-sectoral assembly alang sa 2023 Barangay ug Sangguniang Kabataan Elections diha sa Camp Sergio Osmeña, Sr..
Ang maong kalihokan gitambongan ni Atty. Lionel Marco Castillano, direktor sa Commission on Election-7.
Usa sa highlights sa maong maong kalihokan ang pagnaghiusa sa nagkalain-laing ahensiya sa gobiyerno sa pagbantay sa umaabot nga piniliay nga gilangkuban sa Armed Forces of the Philippines, Department of the Interior and Local Government, Department of Education, National Police Commission, Philippine Coast Guard, Bureau of Fire, Bureau of Jail Management and Penology ug mga miyembro sa Interfaith-Based Group.
Si Castillano sa iyang mensahe nitataw sa importansiya sa peace warriors sa pagbantay sa mga boto sa matag miyembro sa komunidad samtang nagsunod sa dignidad ug patas nga eleksiyon.
Nangulo usab si Castillano sa pinirmahay sa pledge of commitment nga nagpalig-on sa multipartite collaborations aron masiguro nga hapsay ug magpabilin ang demokrasya sa eleksiyon.
Nagpalupad usab sila og mga kalapati nga nagsimbolo sa “Divine interventions” sa panawagan alang sa limpiyo ug malinawon nga eleksiyon sa tibuok rehiyon.
Samtang si Police Brigadier General Anthony Aberin, direktor sa PRO-7 nipadayag sa iyang pasalamat sa naasoy nga mga bisita nga nagpakita sa walay paghupas nga suporta nila aron mamentinar ang kalinaw sa rehiyon-7.
“As you can see, all government agencies, NGOs and force multipliers gather and pledge to do their part towards our collective goal of a safe and secured Barangay and SK Elections 2023. This shows the unity that we have here in Central Visayas for this important undertaking”, matud ni Aberin. (BANAT NEWS)