Ginang gidakop kay namaligya og pekeng government IDs

CEBU, Philippines — Gidakop ang usa ka ginang sa entrapment operation nga gihimo sa mga sakop sa National Bureau of Investigation Cebu District Office (NBI-CEBDO) adlaw nga Miyerkules tungod matud pa sa pagpamaligya niini og fake nga mga government identification cards lakip ang fake nga driver’s license.

Ang nasikop naila nga si Gia Genelazo, residente sa Cebu City.

Si Genelazo, nasikop human kini nitunol sa fake nga LTO non-prof driver’s license ug nidawat sa kwarta nga gigamit sa NBI nga nagpakaaron-ingnong applicant diha sa Barangay Centro, Dakbayan sa Mandaue.

Atol sa pagkasikop sa maong dinakpan naa usab sa mga kamot niini ang laing mga peke nga government IDs sama sa lima ka GSIS Umid Card; lima ka National Identification Cards; tulo ka Postal IDs; duha ka BIR Tax Tin Cards, PhilHealth ID ug Social Security System ID.

Nasakmit sab ang marked money nga gigamit nga mobalor P1,600 atol sa entrapment operation ug ang motor sa suspek.

Matud pa ni Arnel Pura, Agent in Charge sa NBI CEBDO sa press conference kagahapon, ang transaksyon mahitabo online pinaagi sa social media page ug bayad usa daan una ang pag deliver.

Dugang pa ni Pura, ilang nasayran nga ang mga peke nga government IDs ipadala sa Cebu gikan sa Bulacan base sa address nga nakasuwat sa package nga ilang nakuha.

Nakig-alayon sila karon sa NBI didto aron ma trace and sender sa peke nga IDs. Ang mga peke nga ID giingong ibaligya sa mil kinyentos pesos matag usa.

Ang maong dinakpan mag-atubang og daghan kaso tungod sa falsification of public documents. — IBM (BANATNEWS)