CEBU, Philippines — Natumba ang digital traffic light diha sa Cebu South Coastal Road (CSCR) habig sa Barangay Cansojong, Dakbayan sa Talisay human kini masaghiri sa dakong truck kagahapon sa kadlawon.
Ang drayber sa truck nga si Ruben Obedencio, 27-anyos, taga Ibabao, Lungsod sa Cordova nipasabot nga padulong siya nga magpagasolina diin wala niya mabantayi nga sa iyang paglubag sa sakyanan naigo ang digital traffic light ug natumba kini.
Si Jonathan Tumulak, pangulo sa City of Talisay-Traffic Operation and Development Authority (CT-TODA) nibutyag nga nakig-estorya kaniya ang drayber ug niklaro nga disgrasya ang nahitabo.
Matud ni Tumulak nga nipasalig ang tag-iya sa truck nga bayran nila ang nahimo nga danyos. Niklaro usab si Tumulak nga dili kini makaapekto sa dagan sa trapiko sa dapit tungod kay aduna pa kini nag-function nga mga traffic light. — BDB (BANATNEWS)