Spike dali naka-adjust sa bag-ong pinuy-anan
CEBU, Philippines — Dali ra nga naka-adjust si Spike sa bag-o niya nga pinuy-anan sa Barangay Can-asujan, Siyudad sa Carcar.
Kini maoy gipahibawo ni Maureen Claro, ang bag-ong amo ni Spike. Si Spike ang iro nga nag-viral human siya ang gipasanginlan nga nipatay sa iyang kaugalingong amo diha sa Sitio Molila, Barangay Lawaan 1, Syudad sa Talisay.
Ang pagduda nga si Spike ang nagpatay sa iyang kanhi amo ang nahunong na human nigawas ang death certificate ni George Mayol, 63-anyos diin nasuta nga ang namatyan niini gumikan sa atake sa sakit sa kasing-kasing.
Si Claro nga adunay Facebook account nga “Alexa Yna” nitataw nga buotan ra si Spike ug dali rasab nga nakahimamat sa ubang mga iro.
Gibutyag ni Claro nga protective si Spike ilabina nga hilabtan ang iyang lima kakauban nga iro sa uban nga iro.
Hinuon si Spike padayon nga gihigtan ni Claro hangtud nga maabot ang panahon nga masinati na gyud niya ang palibot ug ang iyang mga kauban.
Bisitahon usab unya siya ni Dr. Hope Dejadena, city veterinarian sa Dakbayan sa Talisay alang sa pagpangumusta kaniya ug sa iyang panglawas. (BANAT NEWS)
- Latest
