Kandidato gi-ambushed

CEBU, Philippines — Patay ang usa ka konsehal sa Barangay Cansamuroy ug modagan sab pagka kapitan sa maong barangay human kini gibanhigan diha sa national highway, Barangay Prenza Lungsod sa Balamban pasado alas-5 sa hapon kagahapon.

Ang biktima mao si Anastacio Pacquiao, 60, kinsa dali nga giila sa iyang mga higala human na-post sa social media ang nahitabo kaniya.

Naigo kini sa iyang ulo nga maoy rason nga patay na kining naabot sa tambalanan.

Si Police Lt. Col. Glenn Hife, hepe sa Balamban Police Station miingon nga gikan sa ilang balay ang biktima sakay sa iyang motorsiklo kay dunay gilakaw.

Apan gisundan kini sa mga mamumuno nga sakay sab og motorsiklo ug pag-abot sa nahitaboan gipusil kini.

Usa ka buto ra ang nadungog sa mga saksi nga nakuha sa kapulisan. Dali nga niikyas paingon sa Barangay Vito sa Balamban ang mga mamumuno hinoon ang kapulisan dunay nakuha nga CCTV footage nga makatabang sa pag-ila kanila.

Sa inisyal nga imbestigasyon sa kapulisan wala'y hulga sa kinabuhi nga nadawat ang biktima apan giklaro ni Hife nga palawman nila ilang imbestigasyon ug usa sa posible nilang subayon ang may kalabutan sa politika.

"Walay giduduhan (ang family sa naghimo sa krimen), in fact iyang close nga paryente nga taga didto ra pud na estorya namo wala gyud maghisgot og mga naay threat, or naay kontra, naay away, negative," sigon ni Hife.

Ang biktima gikatahong mikandidato sa pagka-barangay kapitan sa umaabot nga piniliay karong Oktobre 30,2023.  (BANAT NEWS)