Drug den gibungkag, tulo nadakpan

CEBU, Philippines —  Lain na sab drug den ang gibungkag ug tulo na sab ka mga nalambigit sa ilegal nga drugas ang nangadakpan sa buy-bust operation sa Philippine Drug Enforcement Agency (PDEA)-7 ug sa Cebu City Police Office Station 6 sa Sitio Mahayahay II, Barangay Calamba, Siyudad sa Sugbo niadtong Biyernes sa gabii.

Apil sa nadakpan ang giingong tigmentinar sa drug den nga si Rene Francisco Falla alyas Tatay, 58,  kinsa manindahay og butong.

Lakip sab sa nasikop ang iyang mga parokyano nga sila si Joseph Rommar Silinduran, 18, ug Benjamin Jamito Jr., 20, ang tulo pulos residente sa naasoy nga barangay.

Ang operasyon gihimo human nakadawat og impormasyon ang PDEA-7 labot sa drug den nga giingong gimentinar ni Falla.

Dihang nakompirmar ang report gilusad dayon ang maong operasyon, gawas sa mga nadakpan, unom ka putos nga ang nasakmit uban sa mga drug paraphernalia.

Balik prisohan   

Sa laing operasyon, 210 gramong gituohang shabu ang nakompiskar sa kapulisan sa Regional Police Drug Enforcement Unit(RPDEU) sa Police Regional Office(PRO)-7 gikan sa usa ka 34- anyos nga lalake nga nadakpan sa buy-bust operation diha sa Sitio Hubao, Barangay Guba, Siyudad sa Sugbo, Biyernes sa gabii.

Giila ang dinakpan nga si Derick Civil Bontuyan alyas Mating, 34, residente sa Sitio Kalubihan, Barangya Guba ning siyudad.

Ang drugas nga nakuha sa gikan sa dinakpan mobalor og P1.4 million ug gisumitir na ngadto sa Regional Forensic Unit-7.

Sa impormasyon nga gihatag sa RPDEU-7 ang dinakpan usa ka ex-convict nga napriso kaniadtong tuig 2016 gumikan sa kasong kalapasan sa Section 5 ug 11 Article II sa Republic Act 9165.

Unom ka tuig kini napriso sa Cebu City Jail Male Dormitory ug nakagawas niadtong buwan sa Nobiyembre tuig 2022.

Nasuta nga si Bontuyan maka dispose og 500 gramong shabu kada semana ug ang area of operation niini dili lang Cebu City apan apil na ang Lapu-Lapu City.

Matud pa nga adunay kontak sa sulod sa Cebu City Jail Male Dormitory si Bontuyan.

Mandaue city

Sa buwag nga operasyon, nasakmit sab ang 100 gramong shabu nga nagkantidad og P680 mil  gikan gidudahang drug pusher nga nadakpan  sa kapolisan sa Presinto  1 sa Mandaue  City Police Office (MCPO) sa buy bust operation Biyernes sa gabii sa Barangay Guizo sa Siyudad sa Mandaue

Si  Police  Major  Andy Michael  Roque, hepe sa kapolisan sa Presinto 1 ang miila sa ilang nadakpan nga mao si Roselio Navarro  III, taga Labangon  sa Siyudad  sa Sugbo apan temporaryo  nga nagpuyo  sa Barangay Guizo.

Talisay city

Samtang nadakpan sa sunod-sunod nga operasyon sa kapolisan sa Dakbayan sa Talisay ang tulo ka drug personalities sa managlahing dapit sa siyudad.

Unang nasikop mao si George Lisondra Magpili alyas JR diha sa Sitio Rattan, Barangay Tanke, Dakbayan sa Talisay niadtong Huwebes sa sa alas 9:25 sa gabii.

Nakuhaan siya og shabu nga nitimbang og walo gramos nga adunay gibana-bana nga balor nga P54,400 ug usa ka .38 nga revolver nga adunay duha ka bala.

Sunod nadakpan si Maricel Mabanag Salonoy alyas Taliling diha sa Sitio Sawsawan, Barangay San Roque  ug nakuhaan sab og 0.65 gramong shabu.

Samtang nasikop sab si Nelson Maneja Alipio gidakop pinasikad sa warrant of arrest gumikan sa kaso niya may kalambigitan sa ilegal nga drugas. Si Alipio taod-taod na kini nga gipangita.—  Rowena Capistrano,Romeo T.  Limpangog ug Gabriel Bonjoc/IBM (BANAT NEWS)