Manipis dili una paagian kay peligro

CEBU, Philippines — Gipahimangnoan sa pangu sa City Disaster Risk Reduction and Management Office (CDRRMO) ang motorista nga likayan lang una ang pag-agi sa Manipis Road sa Barangay Manipis, Dakbayan sa Talisay tungod sa nasinating dautang panahon sa nanglabay nga mga adlaw.

Si Alvin Santillana, pangu sa CDRRMO nagkanayon nga karon nga nagsige ang uwan adunay posibilidad nga adunay pagdahili sa yuta sa bukid ug mameligro ang mga motorista ug mga tawong moagi sa maong dalan.

Ang kabukiran kilid sa maong popular nga dalan padung sa kasadpang bahin sa Probinsya sa Sugbu perming matabunan og mga yuta ug bato gikan sa ibabaw panahon nga tingulan tungod kay mohumok ang yuta sa ibabaw.

Hinuon si Santillana nitataw nga bisan paman sa pag uwan wala sila’y nadawat nga report nga adunay pagdahili sa yuta ug grabeng pagbaha.

Iya sab nga gipa alerto ang iyang mga sakop ingon man ang kabarangayan.

Si Gary Togonon, pangu sa Aksyon Agad Team nitataw nga walay undang ang ilang pagpanglimpyo sa mga kanal. Lakip na sab dinhi ang pipila ka bahin sa sapa.

Nagkanayon si Togonon nga ang basura nga mobara mao gyud pirme ang hinungdan sa pag- awas sa tubig sa kanal nga maoy hinungdan sa pagbaha. (BANAT NEWS)