CEBU, Philippines — Gihingusgan pa sa Lapu-Lapu City Police Office (LLCPO) ang pagpahigayon og checkpoint diha sa nagkadaiyang dapit sa Dakbayan sa Lapu-Lapu.
Gihimo sa kapolisan ang Comelec checkpoint nunot sa gipatuma nga gun ban nga nagsugod niadtong Agosto 28, 2023 ug hangtud kini sa Nobyimbre 29, 2023.
Si Police Colonel Elmer Lim, direktor sa Lapu-Lapu City Police Office (LLCPO) nipasabot nga bisan ang armas nga adunay lisensiya apan walay dokumento nga nagtugot sa pagdala niini sa gawas sa balay mahimo gihapong dakpon ang nadala niini.
Nasayran nga ang filing sa certificate of candidacy (COC) matapos sa Septiyembre 2, 2023 ug ang mga kandidato kinsa nakaduso na og COC gidid-an sa ilang pagpangampaniya hangtud sa Oktubre 18, 2023.
Gitugotan sila sa pagpangampaniya sa Oktubre 19 hangtud sa 28, 2023.
Sa laing bahin, ang Police Regional Office (PRO)-7 wala kini makadawat og abiso kabahin sa postponement sa Barangay ug Sangguniang Kabataan elections sa Probinsiya sa Negros Oriental.
Sayo pa, adunay public hearing nga gihimo ang Commission on Elections sa maong probinsiya diin gikuha ang panahom sa mga nagkalain-laing sektor kong i-postpone o ipadayon ang BSKE sa lugar.
Si Police Lieutenant Colonel Gerard Ace Pelare, tigpamaba ni PRO-7 nagkanayon nga wala pa sila makadawat og impormasyon mahitungod niini apan andam sila.
Aron masiguro nga hapsay ug malinawon ang filing sa COC subsob ang Comelec checkpoint nga gihimo sa PRO-7 aron mamentinar ang peace and order hangtud na sa adlaw sa piniliay karong Oktubre 30, 2023. BDB (BANATNEWS)