CEBU, Philippines — Dugang pundo ang igahin sa Kapitolyo alang sa nagkadaiyang proyekto sa imprastraktura sa kalungsuran sa Probinsya.
Kini ang gipahibalo ni Gobernador Gwendolyn Garcia ngadto sa mga barangay kapitan nga nitambong sa Liga ng mga Barangay general assembly niadtong Agosto 17, 2023.
Ang maong pondo iagi gihapon sa mga board members, mga mayor, bise mayor, ug mga kapitan sa barangay.
Sumala sa Capitol Information Office, gahinan sa gobernador og tag P3 milyones ang bokal, P2 million sa matag Mayor; P1 million sa matag bise Mayor ug tag P200mil ang matag kapitan nga nitambong sa maong kalihokan diha sa EC3 Convention Centre sa dakbayan sa Sugbo.
Ang maong tabang pinansyal magsilbi nga "appreciation" gikan sa Kapitolyo gumikan sa ilang padayon nga pag suporta sa administrasyon.
Gipahimangnoan nuon ni Garcia ang mga opisyal nga ang maong pundo gamiton lang alang sa proyekto sa imprastraktura aron molungtad og dugay ang proyekto ug makita gyud kini sa mga tawo nga adunay gipadulngan ang kwarta sa gobyerno.
"Infrastructure projects na ha, kay para duna gyuy makita," matud ni Garcia. — /MEL (BANAT NEWS)