CEBU, Philippines — Nitabon ang yuta diha sa karsada sa Purok Tambis, Sitio Sandayong, Barangay Cuanos, Lungsod sa Minglanilla kini gumikan sa kusog nga pag-uwan nga hinungdan sa pagdahili sa yuta niadtong Miyerkules sa gabii.
Hinuon walay gikataho nga naangol sa maong hitabo.
Si Mayor Rajiv Enad nagkanayon nga nakadawat sila og tawag ni Kapitan Dongly Traya pasado alas 6:00 sa gabii sa nahisgutang adlaw aron sa pagpangayo og tabang.
Ang mga sakop sa Municipal Disaster Risk Reduction and Management Office (MDRRMO) daling niresponde ngadto sa lugar.
Nasayran nga ang punoan sa mangga ug caimito nitakilid dihang nidahili ang yuta sa ubos hinungdan nga natabonan ang karsada.
Daling gipaputol ang linya sa kuryente sa lugar paglikay sa disgrasya.
Sa laing bahin, nasinati na usab ang pagbaha sa pipila ka bahin sa Dakbayan sa Talisay niadtong Miyerkules sa hapon.
Ang uwan nilanat og duha ngadto sa tulo ka oras nga maoy hinungdan sa pagbaha diha sa nasudnong karsada sa Barangay Bulacao.
Si Gary Togonon, pangulo sa Aksyon Agad Team nagkanayon nga ang lugar mao gyud ang kanunay nga bantayan matag bunok sa uwan.
Dihang nibunok ang kusog ang uwan nisaka ang tubig diha sa lugar nga niabot sa tuhod ang gilawmon.
Matud ni Togonon nga 10 ka sakong basura ang ilang nakuha gikan sa kanal sa maong dapit ingon man gapnod nga nakabara.
Gibuytag ni Togonon nga matag uwan makadawat sila og tawag nga manghangyo nga pahubason ang tubig sa baha diha sa ilang lugar.
Si Togonon nihangyo sa katawhan nga ilabay sa husto nga paglabay ang ilang basura diin responsibilidad kini sa matag usa. BDB (BANATNEWS)