Inahan gidakop human nanagmal sa masuso nga anak

CEBU, Philippines — Gidakop ang usa ka inahan human kini nakit-an nga naglakaw diha sa dalan Magallanes, Siyudad sa Sugbo nga nidagmal sa iyang pito ka buwan nga anak niadtong Martes sa buntag.

Ang maong hitabo nakuhaan og video footage ni Liezel Vigo ug gi-post niya sa Facebook account sa iyang anak nga si Krizella Moris Francia.

Si Vigo nga nahibani sa DYSS Super Radyo GMA nagkanayon nga kuyog siya sa iyang mga anak aron mamalit og sapatos. Iyang nabantayan ang usa ka babaye nga nagbitbit og masuso diin hapakon niini ang dagway sa puya.

Matud ni Vigo nga gibadlong siya sa iyang mga anak nga dili manghilabot apan dili madala sa iyang konsensiya hinungdan nga iyahang gikomprontase ang babaye.

“Daghan man ang tawo sa palibot pero wala gyu’y nisuway sa pagtabang sa bata”, padayag ni Vigo.

Si Vigo nagkanayon nga nailog niya ang bata dihang ibunal unta kini sa inahan diha sa karsada.

Nidagan siya ug gigukod sa inahan sa bata gani naigo pa siya sa tamparos apan wala niya kini panumbalinga aron maluwas ang bata.

Apan ang maong inahan nakahigayon kini sa pagkuha og balik sa puya ug niining higayona niresponde na ang mga polis ug gidakop ang nahisgutang inahan.

Si Police Colonel Ireneo Dalogdog, direktor sa Cebu City Police Office nagkanayon nga gikustodiya sa Women and Children Protection Desk ang inahan samtang gi-turnover nila ang bata ngadto sa Department of Social Welfare and Services. Nagkanayon si Dalogdog nga adunay deperensiya sa pangisip ang inahan.

Nasayran nga adunay kapuyo ang maong inahan nga niapas ngadto sa buhatan sa kapolisan.

Si Dalogdog nidayeg kang Vigo kinsa niluwas sa bata ug hatagan nila kini og pasidungog.

Samtang si Dr. Ester Concha, pangulo sa DSWS nagkanayon nga adunay bun-og ang bata hinuon luwas na kini.

Si Concha nagtuo usab nga adunay deperensiya sa pangisip ang inahan hinungdan nga morekomendar sila nga ipalayo lang una ang inahan sa bata.

Ilaha usab nga susihon ang kapasidad sa kapuyo sa babaye kong makabuhi kini sa bata aron masiguro ang kaluwasan sa masuso. —/BDB (BANAT NEWS)