CEBU, Philippines — Naa na sa 20 ka poste sa Cebu South Coastal Road (CSCR) sa Dakbayan sa Talisay ang napasiga matud pa ni Jonathan Tumulak kinsa pangu sa City of Talisay-Traffic Operation Development Authority (CT-TODA).
Matud pa ni Tumulak nga hinay-hinay na nga mapahayagan og balik ang lugar human sa pila ka buwan kini nga pwerteng ngitngita ug daghan silang reklamong nadawat bahin niini.
Pero karon naa na sa 20 ka poste ang napasigaan sud sa 192 ka poste sa tibuok kutay sa CSCR paingon sa Barangay Lawaan 1.
Matud pa ni Tumulak nga gipaabot sa taga Department of Public Works and Highways (DPWH) nga mapabarog na ang mga poste aron mosunod na dayon ang solar nga suga.
Nagkanayon si Tumulak nga posible sa dili pa ang kapistahan karong Oktubre mapasigaan na ang tanan nga suga. (BANAT NEWS)