CEBU, Philippines — Makonsiderar na nga obsolete o karaan na ug dili na haum gamiton ang gitawag og “state-of-the-art” traffic light system nga dunay traffic light counters nga gigamit dinhi sa dakbayan sa Sugbo.
Kini suma pa ni Ernest Herrera ang usa sa mga special assistant ni Cebu City mayor Mike Rama human sa ilang pagbisita didto sa buhatan sa Metropolitan Manila Development Authority(MMDA) sa kaulohan. “Traffic light counters are no longer “recommendable” segun pa ni Herrera kinsa gikuyogan didto sa kaulohan ni Cebu City Transportation Office’s assistant head, atty. Kent Franscesco Jongo.
“All over the world, kita ray nakagamit ig ana, Dili na haom sa panahon,” dugang ni Herrera.
Si Herrera ug Jongoy ang gipada ni mayor Rama ngadto sa kaulohan aron mo obserbar kun giunsa sa MMDA ang pag-handle sa sitwasyon sa trapiko sa 17 ka local government units LGUs sa Metro Manila diin kadaghanan niini mga highly-urbanized.
Si MMDA chairman Atty. Romando Artes mao ang nangunay pag tour sa mga Cebu City representatives sa ilang command center diin ilang nakita ang mga high-tech equipment.
Suma pa ni Herrera nga usa ka mabungahon ang ilang pagbisita sa MMDA ug ilang nakita ang mga high tech gadgets nga mahimo kaayo ma adopt sa siyudad sa Sugbo.
Lakip sa mga gadgets nga nagustohan pag-ayo ni Herrera mao ang camera nga gigamit sa MMDA nga mahimo nga ma zoomed sud sa 30 ka higayon diin makakuha og klaro nga picture sa plate number sa mga sakyanan aron dali mailhan ang mga violators.
Dugang ni Herrera nga ang MMDA migamit sa teknolohiya sama sa Korea, Germany ug Singapore nga mahimo kaayo nga mabuhat dinhi sa Sugbo
Samtang importante usab ang pag-update sa skills sa mga local enforcers diin ang MMDA andam usab nga motabang niini.
Gawas sa pagpahigayon og training, ang MMDA gipaabot usab nga personal nga mosusi sa traffic system dinhi sa Sugbo aron ilang makita kun unsa pa ang gikinahanglan nga i-upgrade ug ipabilin. — /MEL (BANAT NEWS)