Sam-ang sa Calamba paninduton

CEBU, Philippines — Nagsugod na ang pagpanindot ug pagpaayo sa Cebu City government sa sementeriyo sa Calamba sa Dakbayan sa Sugbo.

Si Cebu City Mayor Michael Rama maoy nangulo sa ground-breaking ceremony sa maong sementeriyo ubos sa Barangay Calamba ug sa Archdiocesan Shrine of San Nicolas de Tolentino parish.

Nitambong usab si Liga ng mga Barangay president ug ex-officio city councilor Franklyn Ong ug kaubang konsehal sa siyudad nga si Joy Pesquerra uban ang mga kapitan sa Barangay Calamba Victor Quijano ug Clifford Jude Niñal sa San Nicolas Proper.

Si Ninal sa pakighinabi sa Banat News nagkanayon nga nalipay siya sa pagkalambigit nila ni Monsignor Roger Fuentes sa pagpahiuli sa nahisgutang sementeryo diin nagkupot kini og bililhong handumanan sa karaang panahon. Gisugdan na ang paghawan ug pagpanglimpiyo sa mga obstruction sa maong lugar aron ma-appreciate na sa mga tawo ang kanindot sa maong sementeriyo ilabi na ang sulod nga kapilya.

Gipaabot usab nga masugdan na sa dili madugay ang restoration works sa kapilya. Si Mayor Rama nihatag og importansiya sa pagpahiuli sa mga karaang sementeriyo ug gihimo kini nga heritage park isip pasidungog sa mga katigulangan sa mga Sugbuanon samtang gilantaw usab kini nga inspirasyon sa paghimo og maayong buhat alang sa umaabot.

Gawas pa niini, ang pagpasig-uli sa mga karaang sementeriyo gipaabot usab nga makadugang sa pagpauswag sa ekonomiya ug sa mga paningkamot sa turismo. Ang paghawan ug pagpanindot sa karaang mga pampublikong sementeriyo nakita usab nga epektibong paagi aron luwas ang mga Sugbuanon sa mga daotang elemento ug ilegal nga kalihokan human ang pipila ka mga karaang sementeriyo sa siyudad nahimong tagoanan o ilegal nga gipuy-an sa pipila ka mga tawo.  Ug tungod niini, gipaabot usab ni Rama ang dugang mga pribadong kompaniya nga motabang aron makab-ot ang restoration ug beautification efforts sa kagamhanan sa siyudad sama sa nahitabo sa Donya Pepang cemetery. —/BDB (BANAT NEWS)